Юбка танлаш
шанба, 2015 Июл 25 Мухлиса Хакимова
Аёл гўзаллиги ҳақида қанча гапирманг, шунча оз туюлади, гўё. Унинг ҳусну таровати, мафтункорлигига таъриф нафақат чиройли қомат ва оро берилган қошу кўз, балки қоматга мос танланган либос билан ҳам баҳоланади. Бугун ёзги узун кўйлак ва сарафанлар билан бир қаторда турфа хил юбкалар ҳам аллақачон мода билан ҳамнафас аёл ва қизларимиз гардеробидан жой эгаллаган. Шундай экан, юбка танлашдаги бир нечта кичик тавсияларни билиш асло зарар қилмайди.
"Қаламча" юбка
Классик услубдаги юбкалар замонавий хоним гардеробининг асоси саналади. Қора ва кулранг "қаламча" услубидаги юбкаларни кун давомида турли кўринишда кийишингиз мумкин. Масалан, сиз қатъийлик ва талабчанлик қиёфасига урғу беришни истасангиз, қаламча юбка ва шу рангга мувофиқ танланган блузка, пиджак ва аксессуарларни уйғунлаштиришингиз лозим. Шунингдек, бундай юбкалар нимча, свитер ва туникалар билан ҳам ажойиб уйғунлаша олади. Кечки базмлар учун, жимжимадор шунингдек, нақшинкор чизгилар тортилган шойи, ипак ва нафис матодан ишланган ҳар қандай юбкалар сизга маликаларга хос виқор ҳамда нозик башанглик ҳадя этади.
"Макси" юбкалари
Айни урфда бўлган ва оёқларни тўлиқ ёпиб турувчи бу услубдаги юбкалар сизни ҳақиқий маликага айлантириши аниқ. Айниқса, бўйи пастроқ хонимларимиз бундай юбкаларни узун пошнали босоножка ва қоматга бироз ёпишиб турувчи блузка кофта ёрдамида уйғунлаштириб, бўйларини узунроқ, белни эса ингичка кўрсатиш имкониятига эга бўладилар.
Тўғри бичимли ўртача узунликдаги юбкалар
Оёқлари тўладан келган аёлларимиз камчиликларини яширувчи бундай бичим асосан ён тарафдан кесилган бўлиб, қоматга бироз ёпишиб туради. Орқа ва олд қисмдан тортилган кесиқли юбкаларни эса танламаганингиз маъқул. Ансамблнинг тепа қисмига буксадан бироз тушиб турувчи ёрқинроқ, аммо юбка рангидан унча узоқлашмаган ҳолда танланган блузка кўринишингизга ўзгача кўркамлик бағишлайди.
Ҳашамдор юбкалар
Улар белдан кийилишга мўлжалланган бўлиб, қоматингизни расо қилиб кўрсатади. Кийганда Барби қўғирчоқларини эслатувчи бундай юбкаларни қора колготкилар билан кийишдан бироз узоқлашинг. Акс ҳолда оёқлар кўриниши янада ингичка кўриниб қолиши мумкин.
Ёдда тутинг!
Агар танлаган юбкангиз бироз калтароқ ва қоматга ёпишиб турувчи бичимда тикилган бўлса, оёқни чалиштириб ўтирмасликка ҳаракат қилинг. Негаки, бундай ҳолатда ўтириш атрофдагиларга нисбатан беҳурматликдек туюлиши ва кўринишингизни қўполлаштириб кўрсатиши мумкин.
Ижтимоий тармоқларда дўстларингизга тавсия этинг
